தண்ணீர் எனப்படுவது
யாதெனக் கேட்க
குழாயிலிருந்து வருவதெனக்
கூறியது குழந்தை
ஐம்பூதங்களில் ஒன்றென்றான் ஞானி
இரு மூலக்கூறு ஹைட்ரஜன்
ஒரு மூலக்கூறு ஆக்சிஜன்
எனக் குழப்பினான் விஞ்ஞானி
காசு கொடுத்தால்
கொள்கலனில் கிடைப்பது
என்றான் நகரவாசி
மதுவோடு இணைந்த
மந்திரக் கலவை
எனப் பிதற்றினான் குடிகாரன்
அடிப்படைத் தேவை என்றான் குடிமகன்
வாக்குறுதிப் பட்டியலில்
தேடினான் அரசியல்வாதி
தன் நிலமகளுக்கான
இயற்கையன்னையின் தாய்ப்பால்
என்றான் விவசாயி
இன்னும் ஒலித்துக்கொண்டிருக்கிறது...
தாய்ப்பாலுக்கான
ஒரு குழந்தையின் அழுகுரல்!
No comments:
Post a Comment