காலப்புத்தகத்தின் கசங்கிய பக்கங்களிலிருந்து...

கசங்கிய பக்கங்களால் ஆனது
காலப்புத்தகம்!
கிறுக்கல்கள் நிறைந்தவை
அதன் கசங்கிய பக்கங்கள்!

அதன் முதல்பக்கம் 

தேடுதல் வேட்டையில்...
கடைசிப்பக்கம்
விடையில்ல வேட்கையில்...

கிறுக்கல்களூடே கிறுக்கல்களாய்
தன்னிச்சையாகப் பதிவேறுகின்றன
கால ஓட்டத்தின் நிகழ்வும்
புரிந்தும் புரியாத அதன் பொருளும்!
 
பதிவுகளில் சில
வேதப்பொருள் உரைக்கும்!!
மற்றும் சில
விஷப்பொருள் உரைக்கும்!!

சில நேரம் பொருள் நேராகும்!
சில நேரம் பொருள் தலைகீழாகும்!

மறுதலிக்கப்பட்ட நிகழ்வுகள்
மறுபதிவேற்றப்படும்!
சில அடித்தல்களோடும்
திருத்தல்களோடும்!!

அப்பொழுது
சில பொருள் மீண்டும் நேராகும்!
சில பொருள் மீண்டும் தலைகீழாகும்!

எது எதுவாகினும்,
வேதப்பொருள் அனைத்தும்
வலதுகைக் கிறுக்கல்கள்!!
விஷப்பொருள் அனைத்தும்
இடதுகைக் கிறுக்கல்கள்!!

வலதுகைக் கிறுக்கல்களில் தெளிவிருப்பினும்
வேதப்பொருள் அவ்வளவாய் விளங்குவதே இல்லை!

இடதுகைக் கிறுக்கல்கள் நல்லவேளையாய்
கிறுக்கியவனுக்கே விளங்குவதில்லை!

இப்பொழுது கிறுக்கப்படுபவை
வலதுகைக் கிறுக்கல்கள்!!

விளங்கவில்லையோ!!
ஆம்! வேதப்பொருள் அவ்வளவாய் விளங்குவதே இல்லை!