புகைப்படம் காட்டியும்
குறைந்த விலையென்றும்
இன்றே கடைசியென்று
நித்தமும் சொல்லியும்
பொருள் விற்றுக்கொண்டு
சில கடைகள்
வெள்ளி ஞாயிறுகளில்
அதிக விலைக்கும்
ஏனைய தினங்களில்
அடிமாட்டு விலைக்கும்
பயணச்சீட்டு விற்றுக்கொண்டு
சில கடைகள்
தலைப்புச் செய்தி முதல்
தகாத செய்தி வரை
அனைத்தும் உரைத்துக்கொண்டு
சில நாளிதழ் கடைகள்
பழைய இரும்பு ஈயம் பித்தளை
என எதைக்கொடுத்தாலும்
சலிப்பின்றி விற்றுத்தர
சில கடைகள்
திரைப்படச் சீட்டு வேண்டுமா?
வாடகை வாகனம் வேண்டுமா?
சொந்த வீடு வேண்டுமா?
வாடகைக்கு வேண்டுமா? - என
சில விற்பனைக் கடைகள்
உள்ளங்கைச் சிறுவெளியில்
ஓராயிரம் கடைகளென
வியந்துகொண்டே தொடுதிரையில் இடவலமாய் நகர்ந்திருக்க
ஐந்து ரூபாய் வெற்றிலைக்கு
அம்மா அழைத்தபோது
அனைத்துக் கடைகளையும்
மூடிவிட்டு நகர்கிறேன்
அருகாமைக் கடைக்கு...
No comments:
Post a Comment